عــبـــــده اشـــتــغـــالات

ده الاسم طبعا اللى أطلقه الغلابة فى شبين القناطر على المقدم عبد الرحمن غريب رئيس الإشغالات بمجلس المدينة لان سيادة المقدم ظابط شرطة من النوع اللى غاوى يعذب فى الغلابة .... وفى الغلابة بس – وما بيقدرش على غيرهم من أصحاب المحلات المخالفة ورغم أن كل شوارع المدينة مليانه إشغالات ورغم إن كل محل خارج قدامه أربعة متر بالبضاعة بتاعته والناس ما بتعرفش تمشى فى الشارع إلا أن المقدم ترك كل المخالفات واتفرغ للغلابة من سواقين التوك توك وللحقيقة هو من حوالى سنة ونصف حاول يشتغل على المحلات وعمل حمله بس لان أخلاقه وحشة قوى اتخانق مع صاحب محل عطاره اسمه حمادة شومان ولما ضربه الناس اتلمت ورجمته بالطوب وكان هتحصل مصيبة لان الناس كانت مصممة تضربه هو واللى معاه واتعمل محضر فى المركز واتدخل أعضاء مجلس الشعب وأمن الدولة وصالحوهم وخلص الموضوع ومن يومها عرف سيادة المقدم إنه مش قد التجار الأغنياء ....... طب هيعمل إيه ....... لازم حل ..... لازم يشتغل ........ يبقى الغلابة ولاد الإيه سواقين التوك توك ........ أحسن من البطالة ....... يتسلى عليهم ........ كل يوم سيادته يعمل حمله ...... ويمسك سواق التوك توك الغلبان وهات يا ضرب فى وسط الشارع وقدام الناس كلهم ........ باشا بقى ...... والباشوات لازم تضرب الغلابة .... أمال هما باشوات ليه ........ وبعد الضرب والشتيمة والذى منه ياخد التوك توك على مجلس المدينة ويعمل محضر للغلبان اللى كل جريمته إنه قابل سيادته وبدال قابله يبقى لازم الطريحة والشتيمة والمحضر كمان ولو حد اتجرأ وعمل محضر لسيادة المقدم بالضرب ولا يهمه .......أولاً لأن مفيش حد فى البلد يقدر يحاسب سيادته .. ظابط بقى .. ومفيش حد بيحاسب الظباط ..... ثانياً : لأن اسم النبى حارسهم بتوع المجلس المحلى ومجلس المدينة بيروحوا يضغطوا على الناس عشان يتنازلوا ثالثاً : لأن المضروب سواق توك توك والظابط يقدر يبهدله كل شوية فبيتنازل تحت التهديد وحتى فى معظم الأحوال المضروب ما بيقدرشى يعمل محضر ....... أخر عمايل حضرة الظابط الهمام إنه حاول يوقف شاب سايق توك توك اسمه أحمد عبد اللطيف محمد سالم من قرية كفر شبين يوم 20 / 11 / 2007 ولأن الولد السواق غلبان يبقى طبعاً هينضرب ... خاف من الضرب ... جرى بالتوك توك ... إزاى يجرى .. كبرت فى دماغ حضرة الظابط ...... جرى وراه بالعربية بتاعة المجلس اللى رقمها 1224 محافظة ... السائق يجرى والظابط وراه ... كبرت فى دماغه أكتر ... تخيل إنه يطارد عصابة التوك توك الأسود ... وده زعيم العصابة مش شاب غلبان الحكومة ما جابتش له وظيفة فلقى شغل لنفسه ... وفضلت المطاردة مستمرة ... لحد التوك توك ما اتقلب بالسواق فى الترعة ... والظابط سابه ورجع ... والولد اتنقل على مستشفى شبين القناطر ... وحولته على مستشفى بنها عشان يعمل أشعة مقطعية ... وربنا سلم ... وطبعا الظابط صلح أهل المصاب بواسطة رئيس المدينة .... ويا دار ما دخلك شر ... وراح السواق بتاع الظابط اللى اسمه رقيب أول مجدى مجاهد عبد الرحمن عزام ومعاه رئيس الحملة الميكانيكية واسمه أحمد محمد حسن حمودة وشهدوا فى المحضر بان الظابط ما كانش فى العربية ساعة الحادثة لأنه كان واقف على كوبرى عبد العال مستنيهم على ما يغيروا الزيت للعربية ويرجعوله ... أى والله شهدوا بكده وما حدش يضحك ... الباشا متواضع قوى بيقف عالكوبرى لغاية ما السواق يغير زيت العربية ... فيها إيه دى ... ولأن قرار المستشار محافظ القليوبية بترخيص التوك توك لا يحمى الغلابة من بطش المقدم عبد الرحمن غريب .... ولأن ما فيش حد بيقدر يوقف حضرة الظابط والداخلية بتحميه ... ولأن أعضاء مجلس الشعب والشورى والمحليات كمان ما حدش بيعمل للغلابة حاجة ... بدأ الغلابة يقاوموا حضرة الظابط بطريقتهم ... طريقة الشعب المصرى .... النكتة والسخرية من جلاديهم .... فسموا الظابط ( عبده اشتغالات ) بدل عبد الرحمن غريب .